قطعه

کیل ای اوغلان بوگون سیندن بویوک بیر امتحان آلمیش

سیناو صحنیده یایلمه! اوزینگدن کتته لیک کورست

 

اولن گین سین سیاست له، بویوک تاریخ سیندن دیر

قدیمدن سینگه بار ایردی بویوک شأن و بویوک شوکت

 

بوگون اوزینگنی چیتلتمه، بوگون میداننی بوش قویمه

تلاتم ایله بان دایم، ییتیرمه - ایسکی لیک همت

 

بهادرلیک ازلدن سینگه تقدیر بولدی، ای باتور!

قرآننی قانونینگ بیلگیل، بابانگ تیمور کبی غایت

 

آچون اسلافی بول، قیتمه، تمدن -تاریخینگ شاهد

سین آلدیندن ایدینگ حاکم، بیلردینگ حکمت و آیت

 

اطاعت قیلمه گنلرکیم، بلانی اوزیگه آلگج!

بولر نینگ باشیدن بیرکتته مینار توزه‌تیش فرصت

له سیرلوسور


لبلری آق – قاغاز کبی، آغزیده گپ، غُمور- غُمور
عشوه بیلن خراب اېتیب، کۉره‌ش توتیب گُبور- گُبور

کولگی بیلن دېسم: کېلینگ، یانیمه اوتۉرینگ قه‌نی
چاپیب کېلیب اۉلتیره‌دی، یاشینیبان شه‌پور- شُپور

قیلدی قره شلری بیلن قیغولریمنی انچه کۉپ!
اېلکه سیدن آلیب سالیب چادرینی ته‌پیر-توپور

جلوه قیلرگه جوکی یوق ، اېرکه اېکن، آنه سیگه
دروازه سینی کۉزیده کۉرسه قاچرشه‌تیر-شوتور

عایله سی بیلرمېنی، کتته وکیچیک آپه سی
همسایه جان کېلینگ دېیب: تامگه اۉتیب اۉتور-اۉتور
* * * * *
اېرکه له‌گن اوکه سینی اۉرگته‌دی اوروش اوچون
تیه‌یلشه‌دی مېنینگ بیلن اېرکه اۉغیل په‌تیر-پوتور

قیلمه گینینگ یخشی بچه، آپه‌نگ نیمه قیلردېسم:
آپم کېلر حاضر تورینگ! نان پشیره‌ر ته‌سیر-توسور

چای کېتیریب سوزیب بیره‌ر، دوشلمه بیرله اۉینه شر
تیشلری بیرله اوریشردوشلمه سی قه‌سیر-قوسور

چای نی ایچیب دوشلمه یب نېچه تمانیزگه قره‌ب
سیوگنیگیز بیلیب ینه، ایش قیله‌دی له‌سیر-لوسور

کیچکینه گینه آپه سی ،اوی ایشینی قیلیب ینه
اۉزنی بېزه‌شگه شیله‌تر،کېچه تمان له‌پور- لوپور

اویقو سیده اۉیله شه‌دی ،مېن بیله کۉپ تیله‌شه‌دی
کېچه شونققه اۉته دی، بدو- بدو، یوگور- یوگور
                                        «همدم»

تورتلیک و تویقلر


غربتده غریب ناتوان بولگه‌یدیر
کونگلی ییریبان، سو وقان بولگه‌دیر
اول ییرده اگر شاه زمان هم بولسه
قوش دیک توتیلیب، نوشکِ جان بولگه‌یدیر

***

اوزبیرنی، یمان بولسه «یمان» اوستیرمه!
کوزینگه تیکان بولسه، «تیکان» اوستیرمه!
سین یخشی اگربولسنگ، ایل یخشی بولر.
ایلدن اوزیلیب اوزگه جهان اوستیرمه!
***
آتینگنی چیقرماقچی موسن؟ ایش قیلگیل!
بولماقچی موسن ایلگه سخن؟ ایش قیلگیل!
تاریخ صحیفه سیده، گر یپراغ بولسنگ!
تینمه‌ی چاپ اوزینگ و ینگیدن ایش قیلگیل!

***

دواغی قیپقیزیل! اوپمه‌ی بولرمی؟
شیمیب، سورسم یوزیدن... اوکولرمی؟
شونققه ایککیمیز، کیچه – کوندوز
سیوینچسک قیغولر اونوتیلرمی؟

***

مین اوچون اوزگیننگ ساوینچی آلگیل
سیوینچیمنی انی کونگلیگه سالگیل
بوایککی سوسه‌گن دینگیز قوشیلسه
سوسه‌گن ایککی دینگیزبیرله قالگیل
***
ایاغدن باشگچه معشوقه اویی
ایماغ- ایچماغ و... بولدی جستجوی
نی آوقت یاقه‌دی، نی سوز ایشیتسم
یاپرکوک بولدی وآلرگه کویی

                         «همدم»

(اوگیت)



کیره‌ک بولدی بوگون بیزگه تیلینگ بیل!
کوره‌ش گیل سینگه تحسین ایله‌سین تیل!

تیلینگ بولسه توریب تیلداشینگ ایزله!
حزر، تیلداش سیزلیکدن حزرقیل!...

جهان سیندن بولیب یورسنگ سماغه!
ایلینگ آلدیده اوزنی کمبغل بیل!

تاریخ لرنی اوقی چیقسین سوادینگ!
کیچه- کوندوز، تینیم کورمه‌ی کوره‌شگیل!

بودنیاپول بیله بیرمس بقاینگ!
بقاتاپماقچی بولسنگ خدمت ایتگیل!
                              «همدم»

اوخله مه...

تورک بولسنگ توربوگون

ای اوچ یوزییل اوخله گن تاریخلی انسان اوخله مه !
اصلی تورک واویغورونسلی ده توران اوخله مه!
هرزمان زیج لرتوزه ب باغ لرده بستان اوخله مه
کیم لیگینگ نی بیل !مونینگدیک لخط بی جان اوخله مه

یاولره یخشی سبق بیرگن «تموچان » اوخله مه

سین اوشل رزمنده لراولاده سی سن ،صولتیم...
یازوقیش مثل بابانگ رزمنده بول ای ملتیم!
کیتمه سین ایمدی سینینگ یانینگدن ایسکی قول خطیم
قنچه لریول لرنی توسیدی تاکه آلسه الفتیم

ارسلان لیک بیرله کیلگن باتور اوغلان اوخله مه

بیرزمان آتینگگه چیقتی سککه لرسین سن اوشل
چیقسه میدان نبرد شمشیراوره ر سین سن اوشل
اوزگه لرنی ایله دی خون چگرسین سن اوشل
بی وفالربولگن ایردی دربدرسین سن اوشل

«ییریوزه اورگندی لر خیرینگ بیله خان» اوخله مه

اصلیت نی یزله گن اوز اصلیدن قالمه یدی کو
کیم لیگی نی بیلسه هرکیم باشقه دن آلمه یدی کو
نسلیگه چوری بولیب اوزلرگه« ذال» بولمه یدی کو
ایل گه باش بولماقچی بولسه قیل وقال قیلمه یدی کو

سقله گیل تیمورمیراثین تیموریان اوخله مه
                                           «همدم»

ارباب نسلی...



آنه یورتیم تینچلیگی کونگلیمده بار ارمان، بیری
 یارقین لیک بیرله کیتماق بورچیمیز، موندن نری

اوزگه لرسوزینی تینگله‌ش بیزگه مطلق دیر حرام
کیل! کیته‌یلیک اولکه داشیم بابا - اجدادیم سری

سیندیریب بیلینی یاولر، کوزلرینی اوییب آل!
بیلگینه‌نگ سیندیرمه‌سین، قورقیب تیلینگ نی یاولری.

ایمدی آنگینگدن ایش آل، آق وقرالرنی تانی
«چونکه انسان اله‌سی ایچکرده بولگن بیشتری»

سین که تاریخ سیمریتیب یورگن بابالرنسلی سن
نیچه بیر«یوغان» خوردن اوتیبان کِیر ایچکری...!

عدل و دادنینگ باشلیغی سیندن بورونلرگه حرام!
سین ایدینگ اوتمیش زمان لر عدل و دادین بستری

هرزمان میدانگه چیقسه - تینگ تاپیلمس ایردی کیم
آتی قالدی بابرو تیموریلرنینگ لشکری...

آنه یورتیمنی بوزیب اوزآتیگه قویماقچیلر
قیته دن آتینگنی اسره‌ب تورک بولگین سنگری

تاشقین سیوگی لرینگ کوکسینگه قاتیب قالمه سین
پرچه‌له‌ب هرییرده باسیب سنچیتیب اور نیشتری

ینگی ایجادینگ بیلن تیلینگنی هم بای ایله گیل!
هارمه سینلر- یخشی می...؟ مکتوبلره کیرسین بَری

شعریت دنیاسیده تولقین اوریب باش کوته‌رینگ
چیقسین هرییردن بیزین ایلیمیزه سخنوری

کوز کوریب عقلینگ توشینگینچه قوتله تاریخینگ
ینگی - ینگی سینه لیشلربیرله اوتگین ایلگری

«آته گه اوغلی چیقر!» سوزینگی انگله‌تگیل یقین
نسلیدن بولگن اصیل‌لر...!سین کبی اوغیل‌لری

بیرنفس هم ایل سیز، اوزینگنی بوش توتمه بوگون!
کیچکینه باتور بولیب...! اوتگن باتورلرسینگَری

سینگه تسلیم بولگه‌ی اولدم کوزلری «لور» دشمنینگ
آتی چیقن باتور اوغلان قیرگه دیب کیلگه‌ی «پری»!

تخت و تاجینگ نی تالان قیلگن لره قیلمه مدد
بیخیدن اوزیب قوریت، ایلدیزینی کیتسین نری!

سینگه قُل لیک هیچ یره‌ش مس؛ چونکه ارباب نسلی سن
دایما ارباب من دیب کورسه تیب یور هرسری

میندن اوتگن قیغونی نسلیمده هیچ کیم کورمه سین
بیر- بیراوگه قول بیریب، قول‌له‌ب کیتینگ یارقین سری
                                               «همدم»

ساغره«سونگره»


باغ بولینگ! سیزدن «ته‌یاغ»، ساغره بولر
عصاسیزلرگه «اَیاغ»، ساغره بولر
اولکه میز سووینی قوشنی ایچمسه
«اوتی»، بوغدای- اسپلاغ، ساغره بولر
بیزنی بارو یاغیمیزنی آلدیلر...
«یان»باسینگ! بو بارویاغ، ساغره بولر!
اوغریلر اربابینی کیسسه‌ک قولین
«چورپه»‌ اوغریگه، سباغ، ساغره بولر
سیز عدالت نی«ایکیب» بیزگه قویینگ!
بی عدالتلر«تی‌یاغ»، ساغره بولر...
کیچه لر یاغدوسیگه زحمت چیکیب
پیروینگیز بولسه «باغ»، ساغره بولر
قیغوکورگن، تویغو- ایزلر هردایم
اوزگه «تورخی» اسپلاغ، ساغره بولر
ملتیز آواره لیگین بیلدیرینگ
برچه سی «کوز» و «قولاغ» ساغره بولر
اولکه میز چخنه‌ب امان بولسه بیلینگ
سیویشیمیز«سنگلاغ»، ساغره بولر
معنویات بابیده بردم یشنگ
بارلیگیزدن «قوش تباغ»، ساغره بولر
                             «همدم»

بیتیک...


ییگیت لرنی اوقیشگه چقیره‌من!
اولکه‌میزنی قپقرانغو ایله بان کیلدی غنیم
باشیمیزدن آلدیو، باشلیغلریمیز ایمی- سیم

ایشیمیزبولدی غریبلیک، باشقه لرگه ایش قیلیش
بیز اوچون تحصیل روا کورمادی کفّارِ رجیم

بیر جاهل ایلنی بیزه سردارِ تاریخ ایله دی
آته‌لر وجداننی بیزگه ضعیف کورستدی، کیم؟

چیننه دیک بیلمس لیگیمیز قولیدن، چیم اوت کبی!
اوزگه لرگه ایش قیلیب بولدیک عجایب «منحدیم»

ایمدی اویغانیب بیلیم یولیگه توشسک هم بولر
اولکه‌میزبرچه ییرین، آلگن شودم قان و ایریم!

شونچه ییل بیزلردن اولدیردی، تاریخلردیرگواه!
ایمدی کسکین تیلگه ایگه، بول؛ سیاسی ایلدیریم

برچه‌میز بیرلیک توزه‌ب، بیرلیکته ریجه لر بیچیب
بیرنی سوزیدن اطاعت، چرچه‌مسدن یاپّیریم!

ایسکی تاریخ تاپیشیب؛ حاضرکیلرگه کورسه‌تینگ!
ینگی نسلیم انگله‌سین، اوز بارو یاغین بیجیریم!

آل بیتیک قولینگه و یارقین خیالاتینگه توش!
سنچیتیب تاتلی دیمکلر یاروغیده توز! «تیزیم»

غزل...


«همدم» قره‌شینگنی غزل ایتتدی
«بلخینگنی» اوزیگه محل ایتتدی
...کویدیو شونی راه حل ایتتدی
سین بیرله بولیشنی عمل ایتتدی
جسمیگه سینی جلّ و بل ایتتدی
هجرینگدن اوزین تاج محل ایتتدی
توشیگه کوریب، پُرسوپَل ایتتدی
بیرکوردی و اولدم غزل ایتتدی

صورتده سینی یلغوز اتَوله‌ر
کورسه یانیده بهروز اتَوله‌ر
صحرادیک اوزین پُرسوز اتَوله‌ر
تونلرده کیسنگ افروز اتَوله‌ر
آسمانیده سین یولدوز اتَوله‌ر
بیرمرته کیله قال! کوز اتَوله‌ر
کیچه‌سین اودم نیمروز اتَوله‌ر
سین سیز اوزینی یلغوز اتَوله‌ر

کوزینگ قره‌لیگی بس ایمس مو؟
عشقینگ مین اوچون قفس ایمس مو؟
هربیرکیلیشینگ هوس ایمس مو؟
مین، کویدیریشینگ نفس ایمس مو؟
اولسم جوابی جره‌س ایمس مو؟
سین سیزحیاتیم خار- خس ایمس مو؟
عشوه‌نگ کوته‌من، بو «yes »ایمس مو؟
سین بیرله بوسم، شوبس ایمس مو؟

بیر قیمتیگه نی آچون یاروتگج
نیردنکی کورینسه تون یاروتگج
فرزانه قدیمی چون یاروتگج!
شالی باشیدن توشون یاروتگج
«همدم» بوله می؟ «شوگون» یاروتگج
جانیمگه نازی اوزون یاروتگج
ارداقلی سوزین سوزون یاروتگج
نازیم، گوزه‌لیم آچون یاروتگج!

ایسله‌تمه لره نیمه اوقول سون؟
:بیرکولگی اوچون چیچک آچول سون
خلق داستانیده آتینگ توتول سون
اولگونچه سنه یوره‌ک توگول سون
قوینینگده اولیب کوزیم یومول سون
سونگی نفسیم، سین بیله بول سون
کیم بوزگوچی بولسه اول بوزول سون
یاشلرگه حکایه میز اوقول سون!
                                 «همدم»

یورتیم...


بیلرموسن کوزیم یاشین نهالی بار ور بولدی
نیمه بولسه کوتیب تورمه‌ی، تینیم سیز کونلریم تولدی

فغان اوردیم، سوزیم عالم یوزین- بیر یه‌یره لیب باسدی!
شهنشاه‌لردن اوتکزدیم، بوکونگیل چیچکی کولدی...

هه‌دی! مین بیرله بولگین تاکه اوزدن ایریلیب قالمه
اریغلرنی سودن تولدیر، سوبیرگین سوسه گن «کول»دی

ریجه نگنی بوزمه‌یو، ایندی یایلیب قاتمه گین هیچدم
نورینگ هریان ساچیب تورگین، نوری بولمس کیشین «اُول»دی!

وگربیلسم که بیرلحظه اونوتگه‌یمن سینی، کویسین!
ازلدن اوزنی کویدیرگن، کیشی بولمس دیدینگ بولدی!

زیارتدن تیله‌ب آلماق، بیزه آلدیندن عیب بولگن
نیگه بوینگی پیت باریب اوشه ایسکی گه آسیلدی؟

یره‌تگن ایگه‌میزدن هم سوره‌ش بولسه شونی دیگه‌ی
آز- آز اورگتتدیمو بیرکون، قوش- هوکیز قویبه‌ریب کیلدی

لیاقت یوق لیگین بیلدیم ولی کونگیل سینی ایستر
مینی اوزگه قیلیب اورتاغ ویا اولدیر، دیگین اولدی!

لحتده قویسه لر جسمیم آچیب موزلاققه تشله‌نگلر
یمان کونلر کوریبتی دیب، ... ینه ایزله‌بتی شویولدی

«یاساقلر» بولدی یولداشیم، گیزیب یورتیم آقیب یاشیم
نهایتده توتینگ باشیم، عزیزلر چیچکیم سولدی!

                                                «همدم»

خلقیم گه خطاب!

                             مثنوی

نیچه مرته کوز یومیب اوتدیک، ینه اوتیش کیره‌ک!
بو «تیکیلگن» یاره لر ملت اوچون سوتیش کیره‌ک

مین انیق بیلگن ایدیم کیملرچپاوول ایله دی
کیملر ایردی کیم اوشه‌ل، کیچه «اوینگگه تیله دی»

«بیشته» کوچلی برماغینگ ایردی که سین «موشلر» ایدینگ
حادثه بیرلن یوقالدی... تینمه سی ایشلر ایدینگ!

هرقه‌یان باره‌ردیک و اوزدن فسانه توغدیریب
اوزگه و بیگانه نی اوزیمنیکی دیب یوغدیریب

کیلگه نیگه آت بیریب، کیلمه گنی آلتین- کوموش
:میلی شو ملت «توییب»، بیز بیرله بولسین همده خوش

دیدیک و هم کیمسه گه قیلدیک کرم لر عاقبت
تاریخه قان توکتی دیب یخشی ایشیمیزقیلدی «کت»

قنچه جور و قنچه هم ظلم و ستملر قیلدیلر
مینگ لب اوزبیک اوغلینی بوینینی بیردم تیلدیلر

شونچه که قینلتیریب بیزنی پریشان ایتدیلر
«مینگ یمانللیغ قیلدیلر مینگلرچه یخشی بیتدیلر»

بوتاریخ آلتین خطی بیزده گواه دیب مختنه‌ر
شنقه‌یب «اورته گه اولتیریب» یمان کونین سنه‌ر

هی که بیزملت! ییگیت لیک شیوه سیگه دومتیگن
ایندی ییگیت لیک نی قوی! سوزله سیاست، سوزله فن

باتور اوغلانلر ینه کوکسینی قلقان قیلگوچی
اوتمیشه قیلیچ ایدی، حاضرده بیلیملی کوچی

اوتمیشینگ نی «قول کیسیب، باشینگنی آلیب» الده دی
ایندی سین خلقینگه بیرگیل، «بو قلم باش ایگمه» دی!

خوددی شونده‌ی یاش- ییگیت لرگه تاریخدن سوزله شینگ
همده تویغولربیانی کیلمیشیدن پیله شینگ

بولمه سین خاملیک قیلیب بیچاره بولسک قیته دن
یورتیمیزنی باشقه گه ساتیب یوقالسک نقشه دن

اورگه تینگ باتور ییگیتلرگه که تورکستانی میز
سیز اوشل آچون یاییب یورگن تیمور اولادی سیز

بو اوزون یولده اولیب- ییتدیک، بوگون ایتیش کیره‌ک!
کوپ تیکیلگن یاره لر ملت اوچون سیتیش کیره‌ک...!
                                           «همدم«

ایل تقدیری...

 

ییگیتلر اوچون:

                 منظومه


قراریم؛ آنه تیلده سوزله شیش دیر
بوییتی پوشتیمیز- ارثی وکیش دیر

خدابویریغی هم بیزلر اوچون شو
بیراونی اختریب، اوزنی تانیش دیر

اگر خلق تینچ لیگی دیب ایش قیلرسیز
شوییرده ییغیلیش هم کتته ایش دیر

پلانلرباغله‌شیب، ریجه دن آلدین
اوزیمیزنی تاپیب، یخشی تانیش دیر

بویوک تاریخلیک« ایردیی»، کوپ ییزیلدیک
ینه ییزیلمس آرزوسی همیش دیر

بوگون کینگاش قیلینگ ای آته خانلر!
بوکینگاشلر بیزه ایسکی رویش دیر

بوچیننه‌ب یاتگن اولوس اویغه تینگیز
تاریخ دشمن لرین حقی اوریش دیر

ییگیتلرحلقومی چنقه‌ب مسافر
فقط درس اوقیشیگه وقتی خوش دیر

بابام! بیزده سیاست اورگه تینگیز
سیاست درسینی سیزدن آلیش دیر

تیلیمیزده ایگه لیک بولدی درکار
«تیمور ذات بولسه، تیل گه آلپه میش دیر»

قنی اوتگن اولوس نینگ خاطراتی؟
بوگون اوزنی تانیش هم اوزگه‌ریش دیر

اوتینگ! بیر-بیرگه سیتیزه قیلیش دن
بیزه باباسیتیزه قیلمه میش دیر

اگر اورخون- اینیسی یازوویدن
اوقیب کورگن بوسنگیز، نی سریش دیر؟

سومرلر تاریخیدن نیچه یپراغ
بوگونده یاییشینگ یخشی چه‌لیش دیر

«کفن کش، اوزیک اوغریلر قولیده»
قالیشینگیز اوزی خوددی قه‌میش دیر

تیریک قالماقچی بولسنگ ای اولوسیم
اوزینگنی تاپ، اوزینگدن تیبره نیش دیر

قدیمدن قالگن آلتین آته سوزی
«اوزینگده یوق، عالمده یوق ایمیش دیر»

تیل و ایل یولیده«یاساق» اولیشی
نوایی- بابر اولیشیگه خویش دیر

اگر شونده‌ی اولوسیم چیننه‌ب یورسه
گور ایچینده راحت لیک قالمه میش دیر...

                                    «همدم»

کورسم ینه...


عادتیم بولدی بوگون، سیزنی کوریب یورسم ینه
 شوبیلن بیرگه دیبان یانیزده اولتورسم ینه
 قپقرا ایککی کوزیزبیرله یوزیم کورسم ینه
مینگ بیر ایسته‌ک بولسه و ایککی لبیز سورسم ینه
 
نازنینیم! یوزلریم، یوزیزگه یودیرسم ینه
 
پرسه- پرسه، سیز اوچون کونگلومنی کویدیرماقچی من
 یادیمه توشسنگیز، ای! کوزیمنی اویدیرماقچی من
 واقف ایته‌ی سیزگه دیب بوینیمنی سویدیرماقچی من
 سایه‌نگیزگه یاتقیزیب کونگلیمنی تویدیرماقچی من
 
تاکه بیرمخزن توزه‌ب سیزبیرله یوگورسم ینه
 
هرزمان بیر- بیرنی کورسک تازه بولگج عشقیمیز
 دوشک اوستیگه یاتیب یانیزده ایقیرگنده قیز!
 راحتِ جانیم بوکیچه بولدی شیرین صحبتیز
 طنطنه لیک تویگه دیسم: ایندی خوشبخت ایککیمیز
 
غیبت اونیگه بیگیم! حالیزنی مین سورسم ینه
 
یوخله‌ب یورمنگ نازنین! عشقیز اوچون کویدیم یمان
 اوسمه لر اوسدی وپیشدی، سیز ایدیز مینگه گُمان
 نغمه لیک هربیرسوزینگیزمینگه بولگن جاویدان
 بیزوفاتاریخیده قازانیبان قالسک امان
 
واقف جانانه بولدیز باده توتدیرسم ینه
 
دایما اوتگن زمان یادیمگه توشیب ییغله‌تر
 لبلرینگیزنی شیرین لیگی یوراگیمنی سوتر
 یه‌یره لیب تامیرلریمده قان کبی عشقیز اوتر
 کَجَکینگیزنی سیله‌ب یورگنلریز، کیم اونیتر؟
 
بیرزمان بولگه‌ی موکن بو ایشنی بویورسم ینه-
 
- ایل- اولوس آغزیگه توشگن عاشق و معشوق بولینگ
 شدتِ عشقیزنی ایتیب، تیل توزه شگه اینتیلینگ
 دایماکونگیل بیریب، کونگیل لرین کوزگه ایلینگ
 ناز ایله- سوزوسلام لرحرمتینی هم بیلینگ
 
اتمه لرنینگ عطرینی اوزجانیمه اورسم ینه
 
زار ونالان ییغله‌ب یورگن کونلریم ایسیمده دور
 نا امیدبولمس لیگیم، همده کوره شیم کیمده دور؟
 ینگی ییللرکیلیشی هم وصلی امیدیمده دور
 نیچه بیردشمنلریم عیبیمنی بیلمه‌ی بیمده دور
 
مولدیره‌ب قانیم کبی عشقیزنی یوغورسم ینه

انچه کویسم سیز اوچون مینگه بولیمیش افتخار
 رنگ و رویم سرغه‌یب یولیزگه اولسم نیچه بار
 نغمه و نازیزنی تینگله‌ش مینگه بولدی یادگار
 وازکیچمه‌یمن سیزین عشقیزدن ای قیلمه‌نگ فگار

ایل- اوروغ آلدیده «یاساق»نی اولیشی بی بکار
 زنده اولدیرکیم نگارین عشقیده کورسم ینه

                                             «همدم»

سو-سو...


1387- ییل ده یازیلگن:

 کوزینگنی قاره لیگی، مینگه قیغو بیردی کو!
نششه من! توشگن عجب، ایکی آی اوزره گیسو

فاش ایتسم: چیچکینگ بیر شو، گلستانده آچر!
شاشیلیب یورگن لرینگ هر ییرده کورسه، سو- سو!

هه! اوزینگ هم یخشی بیلگه یسن، کوزیم رازینی
جمله لرنی اوزگریش، نی فایده؟ بو، بیگو- مه‌گو

ارزیگه‌ی قولگه بیتیک آلیب بیر «عمیر» یازیش
نازلرکانی «بوسنگ» بیر، لخته گه سین آبِ رو...

چنقه‌گن ایل


جوزا 7- جوزجان کینتی نینگ ییگیت لری تمانیدن عدالت سیزلیک لر قرشی سیده کوره شیش مناسبتی اوچون:

بویین سوندیرمه! هرناکس اوچون، سین
نسه‌غ لیک سایه سین اوستینگه تشلر
کوزینگ یاشی توتاشر، اوکسینیب مین
ینه بیرعمر سین دیب سرغه‌یرمن
بیزین باغده چیچک لر نوده سی کوپ
چیچک لر نوده سی نینگ غوده سی کوپ
ایشانچ، سیوگی، بیراودن سیسکین مه‌ی...
بیر اویغورلیک و بیر کوز بیرله کوریش
قیش – ایسسیغ دن ثواب آلیشده کیلسه‌ی
کوتر قامت، اوزنگنی تانیب آلگین...
باشینگ بولسه امان سین سن سرافراز
باشینگ یوقلیکته، نی کار؛ نعمت و ناز
تناویع بیر! بوملت، سوسه گن دیر
بولاقدن اجره لیب، کوزلی کیسه ی لر
تیموربولیش قیین ایمس ولیکن
اوزینگ ایسته ب، یوزینگدن کیلسه، پیلر
                                         «همدم»

ایسکی خاطره لریم...


بوگون میندن تنفُّر قیلسه حقّی
اوزینی حق به جانب بیلسه حقّی
کوتیب تورگن امیدیگه ایتالمه‌ی
سوکیب، قرغه‌ب، بو کونگیل تیلسه حقّی

تیانگن تاغیدن تینسین الهیم
ایتیشگن باغیدن تینسین الهیم
اگر باغبانی غلفت قیلدی، میلی
...اوسیملی چاغیدن تینسین الهیم

محبت اوزی شاهد بیز ایکاوگه
کونگیل لر اویلیشی یاقتی یاوگه
عجب افسانه لیک بیر داستان کو!
کولیش- اویین توشیب قالسه قماوگه

قنی کوز؟ کورسه کونگلیم یاره سینی
سیتیلگن اوپکه لر هر پاره سینی ؟
قنی لیلی و مجنون بیلسه ایندی؟
الم لر اوتیشیش، تاباره سینی؟

مینی اورنیمگه هرکیم بولسه اولگچ
آچیلیب، چخنه گن چیچک له سولگچ
یمان کون اوتمه سی- قالمس ولیکین
محبت منزلیده هرنه بولگچ

ستم کوردیم دیبان قیلمنگ شکایت!
سیوملی قیغوسین، کوردیم بغایت
اگربیرکون اولیب توپراققه کیتسم
عزیزینگیز اوچون، اوقینگ«بیر آیت»...!

بوگون باشیمگه ماتم توشتی آخیر
محبت تورنه سی هم اوشتی آخیر
خدا شاهد بو «یاساق» قینه منگلر
کوتیلمس قیغو زهرین ایشتی آخیر

                         1392/3/27 کابل

بیزده کوچ بار...


بیزده کوچ بار، تویغی و بیزلرده تولقینلیک هوس!
بیزعدالت ایلدیزی، بیزمیز آچونده – آق، نفس

اویغن ایندی چیننه‌شیب باشینگ کوتر باتور ایلیم!
تیبره‌نیب ایلپیت چوغینگ، کویدیرگینینگیزلر، قفس!

اوتدی بیزدن معنویت نینگ سیوب مینگلرچه سی
ایلدیزینگنی ایزله ایندی، جیم توریشلربولدی- بس!

گربوکاروان باشلیغی سین بولمه سنگ، قیتیب ینه
کیلسه گرقیتیب ینه، عمریده کاروان توقره‌مس...!
                                             «همدم»

تک-تک...


تک- تکِ ساعت، زمان اوتکه‌زملی
سین زماندن اوتگینینگ! وقتینگ هلی

ببر و قپلان بولگینینگ آچون گیزیب!
ایریلیب، ایلدن اوزاغ کیتمه! بلی!

چیننه‌شیب بیر- بیرگه ینده‌شیب تور و...
اجره‌لیب، بولمه مثالی«چوملی» !

چیلچیراق بول ییمته سون آلتین تأریخ!...
تاپیلر ایلدن کوپینچه تنبلی...

کوپ زرنگ بولیش کیره‌ک بوخلق اوچون!
هرزمان تویغی و سیوگی بیرگه‌لی!

هربیریمیز بورچیمیز خدمت بیلینگ!
قیلسه خیانت قیلر، اوزگه ولی...

گر«یاساق» بولسه شعار، هم بیرگه لیک
ایلنی اویغاتیش اوچون «تیبرن»سه‌لی
                                        «همدم»

قطعه


سینی کورگن اوزین ایسدن چیقرگچ
عجایب سن مو یا عجزیمگه قایل؟

یوزینگ بیربار کوریب، اوزین ییتردی!
تیریک لیک چیقدی ایسدن، انس و جین بیل

نه قولینگگه قیلیچ بار، بوینیم آلسه!
نه سینگه بیرسه کوچ، یابولسه حامیل

بیلالمه‌م قیسی یولدن سینگه ییتسم!
و سین بیرله یوریب قیلسم تفاصیل!

بوگون قولیمنی کونگیل تاری چوگدی!
تیشاغلندی ایاغ- قول، ایندی کیل گیل...

                                     «همدم»

قورقه من...


اویله گن پیتیمده، بیل! اوزنی توتیش دن قورقه من
قیغو بیرله سیوگی نی، اظهار ایتیشدن قورقه من

نیچه بیر اورتاقلر مین دیب سویک نی سوو قیلر
مین بوتون عمریمده یخشی گه ییتیشدن قورقه من

انگله نیلمسدن باری سوز و سوراقلر یوق بولر
نیچه بیر کورگنلریمنی انگله تیشدن قورقه من

هم سوینگن تاغ کبی سین مینگه ایردینگ تکیه گاه
ایندی سین سیز هرتمان یالغیز کیتیشدن قورقه من

باشگه ییتمس اویله گن بیرله، قوی اوشبو قیغونی
بونچه کوپ کورگن کوریملرنی بیتیشدن قورقه من

قنچه حس-تویغولریمنی سینگه مین اظهار ایته ی
شعر یازگوچی قولیمنی بیرکیتیشدن قورقه من

باشقه نرسه یوق «یاساق» یولینگگه صدقه قیلگه لی
کیل، سیکین جانیمنی آل، مین تیتره تیشدن قورقه من
                                                           «همدم»

کولگنده...


مین اویده کیریب، کوزینگ- کوزیمگه توشسه

قنچه اویه‌لیب، سلام- علیکم، دیسن!

شوخلیک بیله- یوزینگه باقیب، کولگنده
دنیامده اوزینگ، ایندی کوزینگ یوم، دیسن!
...
آتینگنی توتیب، سوراق بیره‌ر حالیمده
هرنه تیله‌سنگ، جان ایله بیرگوم، دیسن!

...، اینگ سونگی نفس، چیقر زمانی کیلسه
کوز- یاشی توکیب، چیقتی کی کوزوم دیسن!!!

تیلیم توتیلیب، آقوزمه- یاشینگ، دیسم
بولمه‌یدی کوده! کویاتتی کونگلوم، دیسن!

تابوتده سالیب، قیراق، تاغده ایلتسه
سین اولمه‌گنینگ! بلکه مین اولدوم، دیسن...!
***
شونچه سیوه سن مو؟ سیوگیلر سلطانی!
اولگن روحیمه بیردینگ عجب، سین جانی!

سین دیب یازیبان، یورسه شاعر دیوانی
عالمده کوریبمی کیشی سین دیک، قانی؟؟؟

سین بیرله قالیب، باغله‌ش ایدی پیمانی
کورمس کیشی سیندیک آدمی، انسانی!

سین حوررو پری، اوچماغیلر ارمانی
سین سیز اولیشیم، بولدی یمان عنوانی!

کیل یانیمه «یاساق»کیله دی دورانی!
ای روح و روانیمده‌کی، کوکس قلقانی!
                             «همدم»

سین سن...


باشینگ کیتگنده هم، جانبنی تانیشگه تفاصیل قیل!
چیانلر دومبینی باسیب، چاقیش وقتینی بیرماگیل!

شعار بیرسه اوچونمه، تاعمل میدانیده تیرلب
تیلیم، خلقیم، دیاریم دیب، اوزین اولدیرمسه، فامیل!

بیلیب قال کوپ کیشیلربار، سینی«کور» دیب اَتولیدی!
سینی ابزار بیلگنلر، ینه خارلیک کوره‌ر، ای تیل!

سینی اوزیگه قلقان هرکیشی قیلدی، اوسیندن مس!...
اگرسین دیب اوزینی قیلسه قلقان، قدرینی سین بیل!

تیلیم، منگوقویاشیم، ای! بوخلقیم کیملیگی سین سن
باشیم کیتماقچی بولسه هم، هه‌یه مس من! ایشن، بیلگیل!

بوگون سیندن تجارت قیلگه‌لی، بیل باغله گن مفلیس
تیریک بولسم که قویمس من، بومفلیسلرنی ایندی بیل!

اگرخلقیم چیده‌یدی، تنگریا سین چیده مس سن کو!
مونی سین هم چیده‌ب قالسنگ، حقیقتده بویوک مشکیل
                                                    «همدم»

ایککی قشاق


ایککی قشاق بیربولیب بای بولمه‌ل

تامچی – تامچی یاغیبان لای بولمه‌لی


یورتینی پارلاق تمان ایلتماق اوچون

بیری یولدوز ایککیسی آی بولمه‌لی

 
اوز بابا اجدادلری سینگری بولر

آت گه تیمور، تاغگه آلتای بولمه‌لی
 

کوکسیدن – کوکس لرگه سوزنی اوتکه زیب

ایل- اولوس آغزیده نای – نای بولمه‌لی
 

بیری «نی» ایککینچیسی انگه تاووش

سیس بیلن چوپانلره نای بولمه‌لی
 

یاش ییگیت لرکونگلونی تاپیش اوچون

هرزمان، هرییرده وای – وای بولمه‌لی
 

ایککی قشاق بیربولیب خلقی اوچون

چیقتی لر«یاساق» بیله بای بولمه‌لی

                          «همدم»                            

سلّمنادیسون

چیک مشقت لر، بیلیم یورتیگه سلّمنادیسون

قوی بینالرنی اوزینگدن وه- وه سلّمنادیسون
...
بغری تاش عایله لردن کینه سلّمنا دیسون

ییروکوک، عرش وفلک موسیچه سلّمنادیسون

هفته کونی نینگ شاهی آدینه سلّمنادیسون

باغ ایله باغباندن اورگن عشق قنده‌ی نرسه دیر

چیچک اوزره اوخله گن شُدرینگ نه بیلگه‌ی بیرمه بیر

تاکه قولینگ باریچه معشوقه اوینی شیپیر

اوشبویولده کیم که بولسه لیلی – مجنوندن گپیر

یاییلیب تاخته که سینگه برچه سلّمنادیسون

بیرزمان بولگه‌ی موکن اویغاغ ییگیتلربولسه میز

اولکه تینچ لیگی بیلن بیر- بیرگه یاور بولسه میز

قدکوتاریب هرتمان چخماقلی باور بولسه میز

ایسکوریب اوتکن لریمیزدیک وداوربولسه میز

هم خدا اوی بولن، مدینه سلّمنادیسون

باش کوتاریب یاولره انسانلیک اورگت سک ینه

برچه بیربولگنده، تینچ سیزلیکنی کت ایتسک ینه

یاکه یولگه کیلتیریب یوللرنی کورستسک ینه

شهنامه توزدیرگنی تورت یوزله‌ب ایشله تسک ینه

ایندی یاشیریش کیره کمس سینه سلّمنا دیسون

کوپ یوگوردیک دین اوچون تاریخده قالدی اتیمیز

عالم ایچره یه یره دی تورک باله سی دیب ذاتیمیز

تورک وتاتار وبیات ویشنه گن ارلاتیمیز

یاولرینی اولدیریب سورگون ایمیش عاداتیمیز

ربیمیزیادیگه بولگن بولسه سلّمنادیسون

اوشبویورگن یورتلرینگ برچه سی تورکلراویدیر

یولدوزوسیاره لر بیزگه حکایت کوی دیر

انیدی مخته ش بولدی لازویم، برچه نی آبرویدیر

آسیا، غرب و اروپا تورک لریم نینگ کویدیر

ساچی بیلیگه توشیب بیرگینه سلّمنادیسون

                                                «همدم»

مخمس


دهر ارا قیغوکوریب بیت الحزن قورماقچی من

وارثیم یوق لیگدن ایندی سیزبیله تورماقچی من
...
ساده لیک اوی توزه لسه سیزگه تاپشورماقچی من

توغری یورسم کج یوری دیگن کیشی اورماقچی من

لب لرینگیزنی قیزیل کورگنده لب بورماقچی من

رازلریم سیزبیرله مینینگ اورته میزگه قالسه بس

دغدغه یخشی ایمس بولمه‌ی موشوآلتین قفس؟

عاقبت ایککی یریمدن بیربوتون بولگه‌ی هوس

اصلِ سوزیم شومگرایککی یوره کدن بیرنفس

قامتینگیزسایه سیده دایمایورماقچی من

یاد ایته‌ی سیزگه بوگون اصلیده بارقیغولر

لب لریم یاریلگه‌نی مین کمبغل کونگلی یریم

یاشلیکدن ایلدیزیم دیب چیقبیدیم قیلمه‌ی شریم

نوحه لرقوردیم اوزاغلیکدن ایتالمه‌ی بستریم

گپ جوده کوپ سیوگلیم یانیزگه اولتورماقچی من

تیل دیدیم، فرهنگ دیدیم، یورتیم دیدیم قانیم قوریب

چرچه‌مه‌ی یوردیم اولوسیم یورتیده دوران سوریب

کوککه چیققن بابه لر، اجدادیمیزدیک ایسکوریب

هربیری آلتین اوزه یاتگن لیگین کوردیم یوریب

بی کیره‌ک مصرع بیلن یانیزنی سوپورماقچی من

بیرمه بیرییغگن بهالی دُرلریمنی ساچتی لر

نامه میزتوپلنمه سی غارت یولینی آچتی لر

فرقیمیزدن سووبیریب هرییرده بولسه قاچتی لر

شربتِ آدابیمیزنی اوزگه بیرله ایچتی لر

هه! نیاکانیمنی ایندی شورده یاشورماقچی من

نونهال لردن ینه تکراردعاآلماقچی من

یا، شیرین سوزلرنی تینگله شگه قولاق سالماقچی من

آنه تیل نینگ اوستیره‌ی دیب سیزبیله قالماقچی من

لال، دشمن بولسه دیب «یاساق»لی بولالماقچی من
یاخسیسنی ایل دعاسی بیرله سوردورماقچی من
                                                  «همدم»